O pequeno banquete de Conxo

Se o apadriñamento/amadriñamento lector de onte foi unha bonita actividade, o de hoxe xa foi de traca! Esta mañá celebramos o comezo da festa do Banquete de Conxo, "O pequeno banquete", xunto con outra escola de Sta. Comba, Down Compostela, familiares, amigas e amigos, Os Quinquilláns e A Banda da Loba!

A primeira hora da mañá, os compañeiros/as que actuaban no teatro (Lía, Uxía, Gorka, Elías, Ana e Ainara) marcharon á carballeira de Conxo para facer un último ensaio.

Despois de gozar dunha pequena andaina, chegamos o resto do cole e estivemos entretidos mentres esperamos a que comezara o espectáculo.

Por fin comezou a obra de teatro e a todos e a todas gustounos moito! Varios comentarios destacaron o ben que saíra co pouco tempo de ensaio que houbo. Eu, como o voso profe, non podo estar máis orgulloso de vós! Canto talento hai en Conxo! 👏👏👏😍

Ao rematar a representación teatral, que por certo, merece ser ben escoitada pola súa didáctica, a quenda foi para A Banda da Loba. Como se trataba de gravar un vídeo en directo, fixemos un pequeno ensaio para deseguido cantar, bailar e gravar a canción "Ti e eu" un par de veces.

Ademais de fotos, tamén temos un vídeo da actuación. Que ben o fixestes todos e todas ao cantar, bailar e signar! 👌😊

E cando xa iamos marchar para o cole, encontrámonos cun "vello amigo" do curso pasado, o xornalista de radio que nos entrevistara na biblioteca sobre os libros "Cuentos de buenas noches para niñas rebeldes". Saudamos e cantamos na radio en directo! 🎧🎵🎶📻

E isto foi o que deu de si esta xornada tan especial! Espero que gocedes da festa e que teñades unha fin de semana xenial!

Viva o Banquete de Conxo!