"SumAndo sen restar" pretende ser un espazo educativo onde alumnado e mestre mostraremos e comentaremos diferentes asuntos tratados na escola.
Trátase dun traballo conxunto, onde poñeremos todas as nosas ilusións, esforzo e responsabilidade no seu uso.
Esperamos que sexa un espazo onde todos e todas sumemos para unha aprendizaxe positiva!
Despois da visita ao Parque Natural e á duna de Corrubedo, a segunda parte da actividade naturista coa organización CEIDA era facer unha saída a unha praia para realizar unha limpeza da mesma, así como unhas charlas para concienciarnos da necesidade de coidar o medio que nos rodea.
A cousa comezou a complicarse cando vimos que no día sinalado (venres 18) daba mal tempo, polo que tivemos que improvisar. Deste xeito, hoxe fixemos a escapada á praia, e aínda que non puidemos realizar a actividade de limpeza (o CEIDA non puido acompañarnos e necesitabamos uns permisos por parte do concello de Laxe), si gozamos dun marabilloso día de sol e calor.
🌅😎
Antes de chegar a Laxe, fixemos unha breve parada no Castro de Borneiro. O alumnado de sexto xa fora fai tempo, pero é un lugar que merece ser visitado e máis se está de camiño.
Finalmente chegamos á praia de Laxe!
Paseámola dun extremo ao outro e observamos que estaba moi limpa e con poucas mostras de lixo. Logo, asentámonos nun sitio do areal e, despois de merendar, cada neno/a gozou do tempo libre como quixo: darse un baño, xogar co balón, facer castelos de area, xogar co disco, enterramentos baixo a area...
Unha vez secados e cambiados regresamos ao punto de partida para comer baixo a sombra dunhas árbores. 🌳
Para rematar a xornada, compramos uns xeados mentres esperabamos polo bus. 🍦🍧🍨
No hay comentarios:
Publicar un comentario