O noso Samaín

Comeza unha semana especial e diferente a do resto do ano. Comeza unha semana de festa, cabazas, disfraces... Comeza a semana do Samaín! Ao longo destes días decoraranse escolas, centros culturais, tendas, bares e casas con temática de terror e medo. Trátase de pasar uns días terroríficamente divertidos!

Por outra banda, temos que ser conscientes e críticos con esta "invasión" de caveiras, cabazas, máscaras, disfraces... Non deixa de ser algo importado do estranxeiro que non ten moito que ver coa nosa cultura e si coa cultura do consumo.

É unha mágoa que esta festa se distorsione e se "americanice", cando nós temos o noso propio Samaín ao pertencer a unha terra con antepasados celtas.

Hai moitas versións sobre a orixe da festa do Samaín. En xeral, o Samaín relaciónase coa celebración pagana do fin do verán e o comezo do inverno. Na cultura celta, a noite do 31 de outubro era a noite máis perigosa e terrorífica do ano, xa que as portas do outro mundo abríanse para que as ánimas puideran visitar o noso mundo. Para poder evitalas, a xente adoitaba poñer nas ventás ou nas portas das casas caveiras, nabos e máis tarde cabazas iluminadas cunha candea no seu interior.

En Galicia estes costumes mantivéronse, mesturando a honra aos mortos e o culto á morte (día de defuntos) tan arraigado na Galicia tradicional co Magosto. Dependendo da zona, en Galicia podemos atopar celebracións moi parecidas, aínda que con nomes diferentes: calacús nas Rías Baixas, caveiras de melón na zona de Cedeira, colondros por Ourense, calabazotes en Ortigueira, a festa da Noite meiga en Ribadavia... Coñecedes vós outros?

Nesta época do ano, na nosa terra escóitase falar moito de personaxes mitolóxicos galegos como a Santa compaña, os trasnos, as bruxas ou o lobishome. Con isto, os diferentes equipos de investigación faremos un traballo!

Tamén hai coñecidos refráns desta época como:

"No día de defuntos, memoria e frío van xuntos".
"A cabaza e o queixo, sempre ao peso".
"Quen moito ameaza, o medo tenlo na casa".

Coñecedes algún refrán para esta época do ano? Poñédeo nun comentario se é así!

Por último déixovos unhas adiviñas, a ver se sodes capaces de solucionalas!
(Resolvede unha adiviña por persoa para maior participación).

1. Voa coma un lucecú,
    non lle gusta o allo
    nin a luz.                                                           

2. Vou de branco
    e cando aparezo,
    a todos espanto! 

3. Ten dentes e non come,
    ten cabeza e non é un home!  

4. Ten unha vasoira que é un avión,
    un sombreiro moi vello
    e un gran narizón!                                                  .

Saír da zona de confort

Levamos xa varios días lendo o libro "Wonder" e xa comezamos a debater sobre temas moi interesantes, pero tamén complicadas de entender... Para iso estamos no cole, para aprender cousas que moitas veces non están nos libros de texto, non credes?

Así que como cada venres, na nosa hora de biblioteca, lemos e falamos sobre o que lle pasa ao protagonista de "Wonder", August, e isto levounos a falar sobre a zona de confort: o que significa e o positivo que é saír dela de vez en cando para acadar novas aprendizaxes. Isto non sempre é doado de facer e falamos de diferentes exemplos.

Tamén comezamos a facer as nosas propias portadas de "Wonder".

Ademais de falar sobre a zona de confort durante estes días, hoxe fixemos unha pequena ficha que todos e todas deben rematar para o próximo venres e así compartir diferentes experiencias.

Para finalizar, vimos este vídeo que espero que recomendedes ver na vosa casa.

Sede valentes!

Educación vial

O xoves, 11 de outubro, os nenos e nenas de 4º recibiron a visita da policía local de Santiago para falar sobre educación vial. En principio consistiría nunha charla e despois ir visitar a comisaría, pero o tempo ameazaba con chuvia e a visita tívose que pospoñer... O noso compañeiro Álex cóntanolo.

Un día apareceu unha parella de  policías co seu uniforme.  Viñeron a ensinarnos como circular correctamente pola rúa. Utilizaron a pantalla dixital para mostrarnos fotografías e vídeos nos que vimos como circular pola rúa, por onde e como se cruza, por onde podemos andar en bici, coñecer os sinais de tráfico, usar de maneira adecuada a silla dos nenos, as multas, etc.

Logo íamos ir á comisaría con eles, pero como parecía que ía chover, non puidemos ir. Así que seguimos falando. Todos fixemos un montón de preguntas e eles contestáronas.

Ao rematar, Aleixo falou con eles para ir á comisaría outro día. Todos cofiamos nel!

Alexandre.

Como xa sabedes, visitaremos a comisaría o luns, día 5 de novembro. Agardemos que non chova!

Día da biblioteca

Hoxe, 24 de outubro, conmemórase o día da biblioteca e o noso cole celebrouno con varias actividades ao longo da xornada.

Para comezar, pintamos marcapáxinas coa mascota da nosa biblioteca, o polbo Lolo, que serán debidamente plastificados para o seu uso.

Na hora do recreo houbo sorpresas, xa que en vez de ir os nenos e nenas á biblioteca, foi a bibliotreca quen veu ao patio habilitándose diferentes espazos para curiosear, rebuscar e ler libros en compaña doutros nenos.

Ao subir, puidemos disfrutar dun conto titulado "Unha escola nas nubes" narrado e interpretado pola escritora e mestra María José Gulín, que quedou encantada coa vosa participación ao final da historia!

Aquí vos deixamos unhas fotos!

  

MeteoGalicia

Aproveitando que a primeira unidade de Sociais trataba o tempo atmosférico e o clima, decidimos facer unha visita ao centro de interpretación MeteoGalicia para aprender dun xeito máis práctico.

Elías foi un dos alumnos máis participativos daquela mañá e vainos contar en que consistiu e que lle pareceu a experiencia.

Se alguén quere aportar algo máis, escribide un comentario!

Visitar MeteoGalicia foi moi interesante e divertido porque sempre quixen saber o que era... e agora xa o sei!  

Molou moito ver soltar o globo meteorolóxico. Dixéronnos que cada vez se ía facendo máis e máis grande ata que chegaba un momento que estoupaba!

Despois, subimos ao piso superior onde unha rapaza deunos unha charla e púxonos imaxes sobre as cousas que demos no tema de Sociais. Soubemos case todo o que ela preguntou!

Logo, baixamos a outra sala e un chico ensinounos un vídeo onde nos partimos de risa porque un boneco de Hello Kitty viaxaba nun foguete ata o espacio e volvía caer á Terra. Máis tarde, ensinounos aparellos meteorolóxicos como o pluviómetro, o barómetro, o higrómetro... e fíxonos preguntas.

Por último, regaláronnos uns lapis molones!

Encantoume visitar MeteoGalicia!

Elías.

Simón, Uxía e Castelao

Encántanos que os nenos e nenas traigades cousas da casa para ensinar aos compañeiros e compañeiras! Xa o faciamos o curso pasado e neste parece que imos polo mesmo camiño. Ben por vós!

Nesta ocasión, por mor da conversa sobre Castelao, dous compañeiros decidiron traer uns libros.

Por unha banda, Simón trouxo a colección de "Cousas da vida" de Castelao, polo que puidemos ver e comentar algúns debuxos. Pola outra, Uxía mostrounos un libro que analiza o traballo de Castelao enfocado nos nenos galegos da súa época titulado "A nenez galega a través dos anteollos de Castelao".

Somos conscientes de que aínda somos pequenos para entender certas obras, pero non quita de ir coñecendo aos seus autores e algúns títulos destacados.

Moitas gracias polas vosas aportacións!

Castelao maxistral

Co comezo da fin de semana, non quería deixar pasar a oportunidade de recomendar unha exposición ben interesante na Cidade da Cultura adicada a Castelao e ao mundo escolar. Trátase dun conxunto de debuxos, libros, revistas e outros documentos relacionados coa escola da época. O cadro "A derradeira leición do mestre"  é a verdadeira estrela da exposición, xa que nos visita desde Arxentina a onde retornará no mes de marzo. Ademais, poderedes ver unha réplica dunha aula da época cedida polo MUPEGA e que nós xa puidemos disfrutar no noso propio centro o curso pasado, lembrades?

Na clase falamos un pouco disto e pensamos que sería moi interesante acudir a velo, tanto para os pequenos como para os maiores da familia.

Recomendo que vaiades con guía. Hai visitas guiadas os sábados e domingos ás 12.30h e 17.30h. Din que non é necesario reservar, pero coidado porque hai un máximo de 25 persoas por grupo. Informádevos.

Gozade da fin de semana!

Coidemos o noso planeta!

Mirade que boa iniciativa se fará este sábado no concello de Barreiros (Lugo)!
Que vos parece?
Acordádesvos do moito que falamos disto e os vídeos que vimos o curso pasado?
Que iniciativas coñecedes que se están a facer para reducir o uso do plástico?

CONXO NON SE TOCA!

Ao comezo do curso, mentres nos poñíamos ao día despois das vacacións, alumnos e alumnas contáronme a problemática que se está a vivir no centro sociocultural de Conxo. Isto deunos pé a falar da importancia de loitar polo o que un cre. Días despois, a nosa compañeira Lía apareceu no colexio lucindo orgullosamente unha fermosa e reinvindicativa camiseta. Penso que ninguén mellor ca ela para contarnos a situación:

En Conxo a empresa Ferrovial quere cambiar toda a organización do centro sociocultural do noso barrio. Nós estamos loitando para que todo volva á normalidade. Non queremos cambios porque estamos moi contentos e contentas cos nosos monitores e monitoras. Ecántannos as actividades que facemos con eles. Somos coma unha familia! Non queremos cambios!

CONXO NON SE TOCA!

 Lía.

Barceloooonaaaaaa!

Fai uns días deixounos a gran artista Montserrat Caballé, unha das máis admiradas cantantes de ópera do mundo!

Na clase falamos un pouco dela,  de música clásica, de ópera... e isto levounos a falar doutros artistas, entre eles Freddy Mercury e a súa banda de rock Queen. Estes últimos xa eran máis coñecidos por algúns nenos e nenas, pero cando comentei que ambos colaboraran xuntos, non puiden evitar rir polas caras de sorpresa que tiñan todos...

Ópera e rock xuntos?

A canción titúlase "Barcelona". Mirade o vídeo e comentade que vos parece!